ငလျင်ဘေးဒဏ်သင့် ပြည်သူများအား ကူညီထောက်ပံ့နိုင်ရန် ကိုးကန့်တပ် MNDAA ဦးဆောင်ပြီး ကိုးကန့်လူမျိုးများမှ အလှူငွေများ ထည့်ဝင်နေကြသလို ဒေသခံပြည်သူများထံမှ အလှူခံနေကြကြောင်း သိရသည်။

ကိုးကန့်တပ် ထိန်းချုပ်ထားသော အထူးဒေသ ၁ တွင် ငလျင်သင့်ပြည်သူများအား ကူညီနိုင်ရန် ဒေသခံပြည်သူများမှ အလှူငွေများ ထည့်ဝင်နေကြကြောင်း ကိုးကန့်မီဒီယာက ဖော်ပြသည်။

ကိုးကန့်တပ် အုပ်ချုပ်ရေးကော်မတီမှ အကြံပြုပြီးနောက် ကိုးကန့်လူမျိုးများအပါအဝင် MNDAA ထိန်းချုပ်ဒေသရှိ ဒေသခံပြည်သူများက အလှူငွေများ ထည့်ဝင်နေကြခြင်းဖြစ်သည်။

ငလျင်ဘေးဒဏ်သင့် ပြည်သူများအား ကူညီထောက်ပံ့နိုင်ရေး အလှူငွေများ ထည့်ဝင်ပေးကြရန်လည်း လူတန်းစားအလွှာအသီးသီးကို ကိုးကန့်အုပ်ချုပ်ရေးကော်မတီက တိုက်တွန်းနေသည်။

MNDAA ထိန်းချုပ်ထားသော လောက်ကိုင်မြို့နှင့် လားရှိုးမြို့တို့တွင် စာသင်ကျောင်း၊ ဌာနဆိုင်ရာရုံးများနှင့် အုပ်ချုပ်ရေးရုံးများတွင် အလှူခံပုံးများ ထားရှိထားကြောင်းနှင့် ဒေသခံပြည်သူများအနေဖြင့် အလှူငွေများ ထည့်ဝင်ပေးကြရန် တိုက်တွန်းထားခြင်းဖြစ်သည်။

မန္တလေးနှင့် စစ်ကိုင်းဒေသ အပါအဝင် ယင်းဒေသများနှင့် ဆက်စပ်ဧရိယာများမှ ငလျင်ကြောင့် ထိခိုက်ဒဏ်ရာရရှိသူများအနေဖြင့် လားရှိုးမြို့သို့ လာရောက် အခမဲ့ဆေးကုသမှု ခံယူနိုင်ကြောင်းလည်း ကိုးကန့်တပ် MNDAA က အသိပေး ပြောဆိုထားသည်။

စစ်ကောင်စီ၏ မတ်လ ၃၁ ရက်နေ့ ည ၁၁ နာရီ ထုတ်ပြန်ချက်အရ ငလျင်ကြောင့် သေဆုံးသူ ၂၀၅၆ ဦး၊ ဒဏ်ရာရရှိသူ ၃၉၀၀ ဦးနှင့် ပျောက်ဆုံးနေသူ ၃၀၀ ကျော်ရှိကြောင်း သိရသည်။