(ငလျင်ကြောင့် သေဆုံးသူ ၃၀၀၀ ကျော်ရှိနိုင်ကြောင်း ခန့်မှန်း)
မတ်လ ၂၈ ရက်နေ့က ဖြစ်ပွားခဲ့သော ငလျင်လှုပ်ခတ်မှုကြောင့် ယနေ့ ဧပြီလ ၁ ရက်နေ့ နံနက် ၈ နာရီစာရင်းအရ သေဆုံးသူ ၂၇၁၉ ဦးအထိ ရှိလာနေပြီး ဒဏ်ရာရရှိသူ ၄၅၂၁ ဦးအထိ ရှိလာနေသည်ဟု စစ်ခေါင်းဆောင် မင်းအောင်လှိုင်က ပြောသည်။
ယနေ့ ဧပြီလ ၁ ရက်နေ့ နေပြည်တော်တွင် ပြုလုပ်သော ငလျင်ဘေးသင့်ပြည်သူများအတွက် အလှူလက်ခံပွဲ အခမ်းအနား မိန့်ခွန်းတွင် စစ်ခေါင်းဆောင် မင်းအောင်လှိုင်က အထက်ပါအတိုင်း ပြောကြားခဲ့ခြင်းဖြစ်သည်။
“ကျနော့်ဆီ နောက်ဆုံးတင်တဲ့ စာရင်းအထိ ဒီနေ့မနက် ၈ နာရီအထိ ရတဲ့စာရင်းမှာ ပြည်နယ်နဲ့ တိုင်းဒေသကြီး အားလုံးမှာ ၂၇၁၉ ယောက် သေဆုံးပါတယ်။ ၄၅၂၁ ယောက် ဒဏ်ရာရပါတယ်။ ၄၄၁ ယောက် ပျောက်ဆုံးကြောင်း သတင်းပို့ထားပါတယ်။ ပျောက်ဆုံးကြောင်း သတင်းပို့ထားတဲ့ သူတွေကတော့ သေဖို့ဆုံးဖို့အတွက် တော်တော်များပါတယ်။ အခုလည်း ၇၂ နာရီကျော်လာပြီ ဖြစ်တဲ့အတွက်ကြောင့် သိပ်တော့ မလွယ်တော့ဘူး။ သို့သော်လည််းပဲ ကံကောင်းထောက်မစွာနဲ့ ဒီနေ့ အသက်ရှင်လျက် တစ်ယောက် ထပ်ရတယ်လို့ ပြောပါတယ်။ ပြောရရင်တော့ ကျနော်တို့ ၃၀၀၀ ကျော်လောက် သေဆုံးမယ့်သဘော ဖြစ်တယ်လို့ ကျနော်တို့ ယူဆထားပါတယ်” ဟု မင်းအောင်လှိုင်က ပြောသည်။
ငလျင်လှုပ်ခတ်၍ အဆောက်အဦးများ ပျက်စီးခြင်း၊ သေဆုံးသူ များပြားခြင်းတို့မှာ အဆောက်အဦးအား ဆောက်လုပ်ခဲ့သူများ၊ အင်ဂျင်နီယာများကိုလည်း စစ်ခေါင်းဆောင် မင်းလှိုင်က ပြစ်တင်ပြောဆိုခဲ့သည်။
“ငလျင်နဲ့ ပတ်သက်ပြီးတော့ သင်ခန်းစာ ရလာတာက ၁၉၁၄ ခုနှစ်ကနေ စပြီးတော့ ငလျင်လှုပ်ခဲ့တဲ့ဒဏ် ကျနော်တို့ ခံခဲ့တဲ့ဒဏ်ရှိနေတယ်။ ရှိလာတဲ့အခါကျတော့ ဒီသင်ခန်းစာတွေ ကျနော်တို့ ရှိပြီးသားပေါ့။ ငလျင်ဒေသမှာ နေကြတဲ့ ကျနော်တို့တထွေဟာ ငလျင်နဲ့ပတ်သက်ပြီး ကျနော်တို့ အလေးထားဖို့ လိုတာပေါ့။ ကျနော် သွားကြည့်တဲ့အခါမှာ လိုက်ကြည့်တဲ့အခါမှာ တချို့ဟာတွေမှာက အင်ဂျင်နီယာပိုင်းဆိုင်ရာ စိန်ခေါ်မှုတွေ ကျနော်တို့ တွေ့ပါတယ်။ အင်ဂျင်နီယာပိုင်းဆိုတောက သူတို့ကတော့ ဟုတ်လာ ပေါ့ပေါ့တန်တန်နဲ့ပေါ့ဗျာ ဖြစ်ပါတယ်ဆိုပြီးတော့ ဆောက်တာလည်း ရှိပါတယ်။ တချို့ကလည်း ငွေကုန်ကြေးကျ သက်သာအောင်ဆိုပြီး လွယ်လွယ်ကူကူ ဆောက်တာလည်း ရှိပါတယ်။ တိုက်ကို ကျနော်ပြောတပါ။ ကျန်တဲ့ သစ်သားအိမ်ကိုတော့ ကျနော်မဆိုလိုဘူး။ တိုက်တွေ ဆောက်တဲ့အခါမှာ ဒါတွေကို ထည့်မစဉ်းစားဘဲနဲ့ ငလျင်ကို ထည့်မစဉ်းစားဘဲနဲ့ ဟုတ်လာ ပေါ့ပေါ့တန်တန်ပဲ နေလို့ရတယ်၊ ပြုလို့ရတယ်ဆိုပြီး လုပ်တဲ့အခါမှာ တကယ်လည်းဖြစ်ရော ပေးဆပ်မှုပေးရတာ အများကြီးပေးခဲ့ရတာပေါ့။ အသက်ပေးရတာ တော်တော်များပါတယ်” ဟု ပြောသည်။
အဆောက်အဦးများကို တည်ဆောက်သည့်အခါ အင်ဂျင်နီယာပိုင်းကိုလည်း အလေးထားပြီး အဆောက်အဦးများကို တည်ဆောက်ရန်လိုအပ်ကြောင်းနှင့် ငလျင်ဘေးကိုလည်း ထည့်သွင်းစဉ်းစား တည်ဆောက်ရမည်ဟု စစ်ခေါင်းဆောင် မင်းအောင်လှိုင်က တိုက်တွန်းပြောဆိုခဲ့သည်။
