ရခိုင်ပြည် ရမ်းဗြဲမြို့နယ်မှာ မိုးသည်းထန်စွာရွာသွန်းပြီးနောက် မြေပြို၍ ပိန္နဲတောင်ဘက်ရှိ ကားလမ်းမှာပျက်စီးသွားပြီး ဒေသခံပြည်သူများ သွားလာ၍ မရဖြစ်နေကြောင်း ရွာသားများထံမှ သိရသည်။
ပိန္နဲတောင်ကားလမ်းမှာ တောင်မြေပြိုကျကာ ကွန်ကစရစ်လမ်း ကျိုးကျသွားပြီး ကားကြီးသာမက ကားငယ်များပါ သွားလာ၍မရဖြစ်နေသည်ဟု ရမ်းဗြဲဒေသခံတစ်ဦးက ပြောသည်။
“မြေပြိုကျပြီး ကွန်ကရစ်လမ်းက ကျိုးကျသွားတယ်။ ကားတွေရော ဆိုင်ကယ်တွေရော ဘယ်လိုမှသွားလို့ မရတော့ဘူး။ ကားလမ်းအဆင်မပြေတော့ ခရီးသွားလာရေး၊ ကုန်စည်သယ်ယူရေးတွေမှာ တော်တော်အခက်တွေ့နေကြရတယ်” ဟု ပြောသည်။
ပိန္နဲတောင်ကားလမ်းမှာ ရမ်းဗြဲမြို့နှင့် တောင်ကုတ် မအီမြို့ဘက်သို့ ဆက်သွယ်ထားသည့် ကားလမ်းတစ်ခုဖြစ်ပြီး လမ်းကျိုးကျနေသည့်နေရာမှာ ရမ်းဗြဲနှင့် ၁၀ မိုင်ကျော် အကွာအဝေးရှိကြောင်း သိရသည်။
လက်ရှိတွင် အဆိုပါကားလမ်းပျက်စီးနေမှုကြောင့် အကွာအဝေးများသည့်လမ်းကြောင်းတစ်ခုမှ ပတ်၍သွားလာနေကြရကြောင်း ရမ်းဗြဲမှ ကားသမားတစ်ဦးကဆိုသည်။
“လမ်းကပျက်နေတာ ရက်နည်းနည်းတော့ရှိပြီ။ ပြင်တာလည်းမရှိတော့ တခြားလမ်းတစ်ခုကပဲအဆင်ပြေသလို သွားလာနေကြရတယ်။ အခုသွားနေတဲ့လမ်းက ကားလမ်းအကျိုးကို ကျော်ဖို့အတွက် ၁ နာရီလောက်အကြာ ပတ်ပြီးသွားကြရတယ်။ ပြီးမှ ကျိုးနေတဲ့ ကားလမ်းအလွန်ကိုရောက်တယ်။ ခရီးကမတွင်ဘူး။ ဒုက္ခတော်တော်များတယ်” ဟု ပြောသည်။
ရခိုင်တွင် စက်တင်ဘာ ဒုတိယသီတင်းပတ်လောက်မှစ၍ တပြည်နယ်လုံးအတိုင်းအတာအနေဖြင့် မိုးသည်းထန်စွာ ရွာသွန်းခဲ့ရာမှ ရခိုင်တောင်ပိုင်းမြို့နယ်အချို့တွင် ရေကြီးရေလျှံမှုဖြစ်ပွားသည်အထိ ရှိခဲ့သည်။
ထိုအထဲမှ ရမ်းဗြဲမြို့နယ် ကျေးလက်ဒေသအချို့တွင်လည်း ရေကြီးရေးလျှံမှုရှိခဲ့သည့်အပြင် တောင်မြေပြိုကျမှုများပါရှိခဲ့ရာမှ လက်ရှိ သွားလာရေးပိုင်း အခက်ခဲများဖြစ်ပေါ်နေခြင်းဖြစ်ကြသည်။
