ရခိုင်ပြည်အတွင်း ကုန်ဈေးနှုန်းများ ထပ်မံမြင့်တက်နေ

ရခိုင်ပြည်အတွင်း စစ်ကောင်စီထိန်းချုပ်နယ်မြေများနှင့် အာရက္ခတပ်တော် AA ထိန်းချုပ်နယ်မြေများတွင် ကုန်ဈေးနှုန်းများ ထပ်မံမြင့်တက်လျှက်ရှိကြောင်း သိရသည်။

ပြီးခဲ့သည့် သီတင်းပတ်ကစ၍ ယခင်ဈေးနှုန်းထက် နှစ်ဆ မြင့်တက်လျှက်ရှိပြီး စစ်ရှောင်ပြည်သူများနှင့် ဒေသခံများမှာ ကုန်ဈေးနှုန်းကြောင့် စားဝတ်နေရေး ခက်ခဲနေကြသည်ဟု စစ်တွေဒေသခံတစ်ဦးက ပြောသည်။

“ကုန်စျေးတွေက တလောက နည်းနည်းကျပြီး အခုပြန်တက်လာတယ်။ ကျတာကတော့ နည်းနည်းရယ် ပြန်တက်လာတာက ကျတဲ့စျေးထက် ၂ ဆ လောက်ပိုနေတယ်။ ဒီအထဲမှာ ဆန်တစ်အိတ် ကျပ် ၂၈၀,၀၀၀၊ ဓာတ်ဆီ ၁ လီတာကို ကျပ် ၃၂၀၀၀ စျေးနဲ့ တစ်ခြားမြို့နယ်တွေထက်စျေးအပိုဆုံးဖြစ်နေတယ်” ဟု ပြောသည်။

အခြေခံစားသောက်ကုန်းများ အဓိက ဈေးမြင့်တက်နေပြီး ကုန်စည်လည်ပတ်မှု လုံးဝမရှိသလောက်ဖြစ်နေသည်ဟု ကျောက်တော်မြို့နယ် ဈေးကုန်သည်တစ်ဦးက ပြောသည်။

“ကုန်ချလာတဲ့ သူတွေက စျေးတင်ရင် ကျမတို့လည်း တင်ရောင်းကြရတာပဲ။ စျေးတွေက ပြီးခဲ့တဲ့ အပါတ်ထဲကနေစပြီး တက်တယ်။ အခုဆို အရင်စျေးထက် ၂ ဆနီးပါး၊ ၂ ဆ စသဖြင့်စျေးတက်နေကြပြီ။ စျေးတက်တဲ့အထဲမှာ စားသောက်ကုန်က စျေးအများဆုံးတက်တယ်” ဟုပြောသည်။

လက်ရှိ စားသောက်ကုန်စျေးများမှာ ပြီးခဲ့သည့် သီတင်းပတ်အတွင်းက ၁ ပိဿ ၁၅၀၀၀ ကျပ်ရှိခဲ့သည့် ကြက်သွန်နီမှာ လက်ရှိ ၄၀၀၀၀ ကျပ်၊ ၁ ပိဿ ၂၃၀၀၀ ကျပ်ရှိခဲ့သည့် ကြက်သွန်ဖြူမှာ လက်ရှိ ၄၅၀၀၀ ကျပ်၊ နို့ဆီဘူး ၁ ဘူး ၃၀၀၀ ကျပ်ရှိခဲ့ ဟင်းချိုမှုန့်မှာ လက်ရှိ ၄၀၀၀ ကျပ်၊ ၁ ပိဿ ၂၈၀၀၀ ကျပ်ရှိခဲ့သည့် ငရုတ်သီးခြောက်မှာ လက်ရှိ ၃၅၀၀၀ ကျပ်၊ ၁ ဘူး ၈၀၀၀ ကျပ် ရှိခဲ့သည့် အိန္ဒိယ စားဆီ ၁ ဘူးကို လက်ရှိ ၁၂၀၀၀ ကျပ် စသည်ဖြင့် အသီးသီးရှိနေသည်။

အဆိုပါ စျေးနှုန်းမှာ AA ထိန်းချုပ်ရာမြို့နယ်များ၏ ကုန်စည်စျေးနှုန်းများဖြစ်ပြီး စစ်ကောင်စီထိန်းချုပ်ရာမြို့နယ်များတွင် ကုန်စည်စျေးများမှာ ယခုထက်ပို၍ စျေးမြင့်ကြောင်းတွေ့ရသည်။

ရခိုင်ရှိ မြို့နယ်တိုင်းနီးပါး၏ ကုန်စည်စျေးနှုန်းများမှာ တည်ငြိမ်မှုမရှိဘဲ အတက်အကျ မြန်နေကြောင်း ထိုကဲ့သို့ အတက်အကျဖြစ်ပေါ်မှုတွင် ကုန်စျေးအကျမှာ အလွန်နှေးကွေးကာ ကုန်စည်စျေးအတက်မှာ မြန်တတ်ကြောင်း ကုန်စည်အရောင်းဝယ်လုပ်သူများထံမှ သိရသည်။

ထိုကဲ့သို့ စျေးနှုန်းများဖြစ်ပေါ်မှုမှာ ပြည်မနှင့် ဆက်သွယ်သည့် ကုန်စည်လမ်းကြောင်းများကို စစ်ကောင်စီတပ်မှ ပိတ်ဆို့လိုက်ပြီးနောက်ဖြစ်ပြီး ထိုအချိန်မှ စတင်ကာ ရခိုင်ရှိမြို့နယ်တိုင်း၏ ကုန်စျေးနှုန်းမှာ မူလထက် ၅ ဆမှ ၁၀ ဆကြားအထိ မြင့်တက်ခဲ့ပြီး အဆိုပါ စျေးနှုန်းမှာ ရခိုင်တပြည်နယ်လုံးတွင် လက်ရှိအချိန်ထိ ကျဆင်းမှုမရှိသေးဘဲ ရှိနေကြောင်း တွေ့ရသည်။

AA ထိန်းချုပ်ရာမြို့နယ်များတွင်လည်း အိန္ဒိယနိုင်ငံ မီဇူရမ်ပြည်နယ်အတွင်းက လူငယ်အသင်းများ ကုန်ပစ္စည်းသယ်ယူခွင့်ကို ထိန်းချုပ်နေသည့်အတွက် ရခိုင်ပြည် ကုန်ဈေးနှုန်းများ မြင့်တက်နေရခြင်းဖြစ်သည်ဟု စုံစမ်းသိရသည်။

ပုံစာ – ရခိုင်ပြည် မြောက်ဦးမြို့ပေါ်က စစ်ရှောင်များဖြစ်ပြီး ကုန်ဈေးနှုန်း အလွန့်အလွန် မြင့်တက်နေခြင်းကြောင့် ထမင်းနပ်မမှန်တော့ဘဲ ဆန်ပြုတ်ကြိုသောက်နေကြရသည့် စစ်ရှောင်ကလေးငယ်များ။ (ဓါတ်ပုံ – CJ)