ရခိုင်ပြည် ကျောက်ဖြူမြို့နယ် ဓညဝတီရေတပ်စခန်းအနီး ဇွန်လ ၁၇ ရက်နေ့က စစ်ကောင်စီကြောင်းနှင့် AA တို့ တိုက်ပွဲဖြစ်ပွားခဲ့ကြောင်း စုံစမ်းသိရသည်။
နှစ်လကျော်ကြာ နှစ်ဖက်ထိတွေ့တိုက်ပွဲများ ငြိမ်သက်ခဲ့ရာကနေ ကျောက်ဖြူက စစ်ကောင်စီတပ်ဖွဲ့ဝင်များကို AA က ပြန်လည်ထိုးစစ်ဆင်တိုက်ခိုက်နေခြင်းဖြစ်သည်။
ဒေသခံတစ်ဦးက ” ဓညဝတီရေတပ်စခန်းက ထွက်လာတဲ့ စစ်ကောင်စီ စစ်ကြောင်းကို AA က လမ်းမှာ ဖြတ်တိုက်ခဲ့တာပါ။ မနေ့က နံနက်ပိုင်းမှာ ကျောက်ဖြူနဲ့ ၁၀ မိုင်ကျော်ဝေးတဲ့ သိုင်းချောင်းရွာအနီးမှာ ဖြစ်ကြတာပါ။ စစ်ကောင်စီဘက်က အကျအဆုံးများတယ်လို့ သိရတယ်။ စစ်ကြောင်းကတော့ ရေတပ်ဘက်သို့ ပြန်ဆုတ်သွားတယ်။ ဒီနေ့တော့ တိုက်ပွဲဖြစ်တာ မကြားရဘူး။ ” ဟု ပြောသည်။
တိုက်ပွဲဖြစ်ပွားနေစဉ်နှင့် ဖြစ်ပြီးအကြာတွင် ဓညဝတီရေတပ်ဌာနချုပ်နှင့် ကျောက်ဖြူမြို့က တပ်ရင်းများမှ လက်နက်ကြီးများဖြင့် ပစ်ကူပေးခဲ့ကြောင်း သိရသည်။
၁၀၂၇ စစ်ဆင်ရေးကာလ ဇန်နဝါရီလအတွင်းက ကျောက်ဖြူမြို့နယ်တွင် စစ်ကောင်စီ စစ်ကြောင်းများနှင့် AA တပ်ဖွဲ့ဝင်တို့ ကြိုကြားထိတွေ့တိုက်ပွဲများဖြစ်ပွားခဲ့ပြီး AA က ကျောက်ဖြူမြို့ရှိ စစ်ကောင်စီတပ်ရင်းများကို ထိုးစစ်ဆင်မပြုလုပ်ရသေးကြောင်း သိရသည်။
ကျောက်ဖြူမြို့သည် တရုတ်အကျိုးစီးပွားစီမံကိန်း အများအပြားရှိသော မြို့တစ်မြို့ဖြစ်ပြီး တရုတ်လုပ်ငန်းများ မထိခိုက်စေရန် AA နှင့် တရုတ်အစိုးရတို့ ညှိနှိုင်းထားပုံရသည်ဟု သုံးသပ်သူတစ်ဦးက ပြောသည်။
” ကျောက်ဖြူမြို့ကို သိမ်းပိုက်ဖို့ AA က တော်တော်လေး နည်းလမ်းတွေ ရှာဖွေရမယ်။ ကျောက်ဖြူမှာက တရုတ်စီမံကိန်း အများအပြားရှိနေတာကို ပြီးတော့ စီမံကိန်းဧရိယာတွေမှာလည်း စစ်ကောင်စီတပ်ဖွဲ့ဝင်တွေက လုံခြုံရေးယူထားတာတွေရှိတယ်လေ။ တရုတ်နဲ့ AA ကတော့ စီမံကိန်းတွေ၊ လုပ်ငန်းတွေ မထိခိုက်ဖို့ ကြိုညှိနှိုင်းထားပုံရပါတယ်။ ဘယ်လိုညှိနှိုင်းထားသလဲဆိုတာကိုတော့ AA က ထုတ်ပြောတာမရှိသေးဘူးပေါ့နော်။ ” ဟု ပြောသည်။
အာရက္ခတပ်တော် AA ဘက်က ရခိုင်ပြည်အတွင်း ရင်းနှီးမြှုပ်နှံမှု လုပ်ငန်းများကို အကာအကွယ်ပေးသွားမည်ဟု ပြောဆိုထားပြီး ဆက်လက်ပြီးလည်း ထိန်းချုပ်နယ်မြေများတွင် ပြည်တွင်းပြည်ပ ရင်းနှီးမြှုပ်နှံမှု လုပ်ငန်းများ လုပ်ကိုင်ကြရန် စီးပွားရေးလုပ်ငန်းရှင်များကို ဖိတ်ခေါ်ထားသည်။
ကျောက်ဖြူက တရုတ်လုပ်ငန်းများ တိုက်ပွဲအတွင်း ထိခိုက်သက်ရောက်လာပါက တရုတ်အစိုးရအနေဖြင့် AA ကို စစ်ကောင်စီနှင့် အပစ်အခတ်ရပ်စဲရန် ဖိအားပေးလာနိုင်ကြောင်း သုံးသပ်သူများကလည်း ပြောဆိုနေကြသည်။
AA ကမူ အဆိုပါ သုံးသပ်ချက်များကို ငြင်းဆိုထားပြီး စစ်ကောင်စီနှင့် အပစ်အခတ်ရပ်ရန် တရုတ်ကြားဝင်စေ့စပ်ညှိနှိုင်းမှုမှာ အလွန်ခက်ခဲမည်ဟု ပြီးခဲ့သည့် သတင်းစာရှင်းလင်းပွဲ AA ပြောခွင့်ရ ဦးခိုင်သုခက တုန့်ပြန်ထားသည်။
