(မျက်လုံးဒဏ်ရာ ပြင်းထန်သော အမျိုးသမီးကို ရန်ကုန်သို့ ပို့ဆောင်)
ရခိုင်ပြည် သံတွဲမြို့ပေါ်က ရပ်ကွက်များကို စစ်ကောင်စီ ပစ်ခတ်သော လက်နက်ကြီး ကျရောက်ပေါက်ကွဲမှုကြောင့် အသက် ၆၀ ကျော်အရွယ် လင်မယားနှစ်ဦး ထိခိုက်ဒဏ်ရာ ရရှိသွားကြောင်း သိရသည်။
ယမန်နေ့ ဇူလိုင်လ ၉ ရက်နေ့ ညက စစ်ကောင်စီ ပစ်ခတ်သော လက်နက်ကြီးမှာ အမှတ် ၅ ရပ်ကွက် ညောင်ပင်ဈေးက အောင်မင်္ဂလာလမ်းကို ကျရောက်ခဲ့သည်။
ဒေသခံတစ်ဦးက ” ညောင်ပင်ဈေးက လင်မယားနှစ်ဦး လက်နက်ကြီးကျည်ထိလို့ ပြင်းထန်ဒဏ်ရာ ရရသွားတယ်။ ဇနီးဖြစ်သူ အမျိုးသမီးမှာ မျက်လုံးမှာ တော်တော်လေး ဒဏ်ရာ ပြင်းထန်တယ်။ အဲဒါ ဒီနေ့ ရန်ကုန်မှာ ကုဖို့ ပို့လိုက်ပြီလို့ သိရတယ်။ အမျိုးသားက ခန္ဓာကိုယ်မှာ ဒဏ်ရာရတယ်။ ” ဟု ပြောသည်။
ညောင်ပင်ဈေးက မျက်လုံးထိ အမျိုးသမီးမှာ အသက် ၆၀ အရွယ် ဒေါ်ကြည်ထွေး ဖြစ်ပြီး ခြောက်ထောက် ဒဏ်ရာရရှိသွားသော သူ့အမျိုးသားမှာ အသက် ၆၃ နှစ်အရွယ် ဦးငပိန် (ခေါ်) ဦးမြင့်နိုင် ဖြစ်သည်။
နောက်ထပ် ဒေသခံတစ်ဦးက ” မနေ့ညက သံတွဲမြို့ပေါ်က ရပ်ကွက် ၄ ခုလောက်မှာ လက်နက်ကြီးကျတာ။ သမုတ်ချောင်း၊ ညောင်ပင်ဈေး၊ အောင်မင်္ဂလာလမ်း၊ ငကျော်တောင်နဲ့ မြို့ပြင်တွေမှာ လက်နက်ကြီး ၅ လုံးထက်မနည်း ကျရောက်ပေါက်ကွဲခဲ့တယ်။ လူနေအိမ်တွေလည်း ၁၀ ဆောင်ထက်မနည်း ထိခိုက်ပျက်စီးသွားတယ်။ ” ဟု ပြောသည်။
ဇူလိုင်လ ၂ ရက်နေ့ကလည်း လေကြောင်း ဗုံးကြဲပစ်ခတ်မှုကြောင့် သံတွဲမြို့နယ် မြုံပြင်ကျေးရွာက အမျိုးသမီး ၅ ဦး ထိခိုက်ဒဏ်ရာရရှိခဲ့ကြောင်း သိရသည်။
သံတွဲမြို့ပေါ်တွင် လူအများစုက အိုးအိမ်စွန့်ခွာ ထွက်ပြေးတိမ်းရှောင်နေကြပြီး ဆေးရုံဝန်ထမ်း၊ ရုံးဝန်ထမ်းအချို့နှင့် ဒေသခံပြည်သူ ရာဂဏန်းခန့် ကျန်ရှိနေသေးကြောင်း စုံစမ်းသိရသည်။
သံတွဲမြို့ အနီးတစ်ဝိုက်နှင့် ငပလီမြို့ထဲတွင် စစ်ကောင်စီနှင့် AA တို့ တိုက်ပွဲများ ပြင်းထန်လျှက်ရှိနေပြီး ငပလီအခြေစိုက် ခမရ ၅၆၆ တပ်ရင်းနှင့် သံတွဲလေဆိပ်ကို AA က သိမ်းပိုက်ထိန်းချုပ်ထားကြောင်း သိရသည်။
ဆက်လက်ပြီး သံတွဲမြို့နယ်တွင် တစ်ခုတည်း ကျန်ရှိနေသေးသည့် ခလရ ၅၅ ကို သိမ်းပိုက်နိုင်ရန် AA က ထိုးစစ်အရှိန်မြှင့် တိုက်ခိုက်နေကာ ထွက်ပြေးလွတ်မြောက်နေသော စစ်ကောင်စီတပ်သားများကိုလည်း လိုက်လံရှင်းလင်းနေကြောင်း AA က ထုတ်ပြန်ထားသည်။
သံတွဲမြို့သိမ်းတိုက်ပွဲတွင် စစ်ကောင်စီက ကြည်း၊ ရေ၊ လေ သုံးခုစလုံးဖြင့် အပြင်းအထန် ခုခံနေသော်လည်း AA ဘက်က စစ်ရေးအသာစီးနေကာ စစ်ကောင်စီက အရပ်သားပြည်သူများအပေါ် ဦးတည်တိုက်ခိုက်လျှက်ရှိနေကြောင်း ဒေသခံများက ပြောဆိုကြသည်။
