ထိုင်းနိုင်ငံ ဆောက်လုပ်ရေး လုပ်ငန်းခွင် တစ်ခုတွင် ကရိန်း မတော်တဆပြိုကျမှုကြောင့် မြန်မာရွှေ့ပြောင်း အလုပ်သမား ၆ဦး သေဆုံးခဲ့မှုတွင် ရခိုင်လူမျိုးတစ်ဦးပါဝင်ပြီး ၎င်း၏ မိသားစုနှင့် တိုက်ရိုက် အဆက်အသွယ် ရရှိရေး လိုအပ်နေကြောင်း သိရသည်။
မတ် ၂၉ ရက်နေ့က ထိုင်းနိုင်ငံ ချွန်ဘူရီခရိုင်၊ လယောင်မြို့တွင် Xin Ke Yuan Steel factory အမည်ရှိ တရုတ်ကုမ္ပဏီတွင် ဆောက်လုပ်ရေး ကရိန်းပြိုကျခဲ့သဖြင့် မြန်မာအလုပ်သမား ၆ ဦးနှင့် တရုတ်နိုင်ငံသား ၁ ဦး သေဆုံးခဲ့သည်။
အဆိုပါ သေဆုံးသူများထဲမှာ ရခိုင်ပြည်၊ မင်းပြားမြို့နယ်မှ အသက် ၂၆ နှစ်အရွယ် အလုပ်သမားတစ်ဦး ပါဝင်ပြီး ၎င်းမိဘများနှင့် အဆက်အသွယ် မရရှိသေးဘဲ လျှော်ကြေးပေးရန် အတွက် အခက်အခဲ ဖြစ်နေကြောင်း သိရှိရသည်။
မြန်မာအလုပ်သမားအရေး ကူညီဆောင်ရွက်ပေးနေသည့် WAG အဖွဲ့ဝင် တစ်ဦးက “ကျနော်တို့ သေဆုံးသွားတဲ့ မိသားစုတွေနဲ့ အဆက်အသွယ် မရသေးပါဘူး။ သေဆုံးသွားတဲ့ မိသားစုဝင်တစ်ယောက် အဆက်အသွယ် ရထားပါတယ်။ မိဘတွေနဲ့တော့ အဆက်အသွယ် မရသေးဘူး။ ကျနော်တို့အဖွဲ့ကလည်း နစ်နာကြေး ရရှိဖို့ ကြိုးစားနေပါတယ် “ဟု Western News ကို ပြောသည်။
ထို့အပြင် သေဆုံးသူများကို နစ်နာကြေး ပေးရာတွင် သေဆုံးသူများထဲမှ တစ်ဦးနှင့် ဆွေမျိုးတော်စပ်သည်ဟုဆိုကာ နစ်နာကြေးကို ပွဲစားတစ်ဦးက ထုတ်ယူမှု ရှိခဲ့ကြောင်း မြန်မာအလုပ်သမားအရေး ကူညီဆောင်ရွက်ပေးနေသည့် WAG အဖွဲ့ဝင် တစ်ဦးက ဆက်လက် ပြောသည်။
“မနေ့ က အရှုပ်အထွေး နည်းနည်း ဖြစ်သွားတယ်။ သေဆုံးသွားသူရဲ့ ဆွေးမျိုးတော်စပ်တယ်လို့ ပြောပြီး ငွေထုတ်သွားတယ်ပေါ့နော်။ ကျနော်တို့ကလည်း သူတို့ရဲ့ဆွေမျိုးဆိုပြီးတော့ ထုတ်ပေးလိုက်တာပါ့နော်။ သက်ဆိုင်ရာအဖွဲ့အစည်းတွေ ထိုင်းအာဏာပိုင်တွေ ပူးပေါင်းပြီးတော့ ထုတ်ပေးလိုက်တာပါ။ လက်မှတ်ထိုးပြီးတော့ ထုတ်သွားတာပါ။ ညနေပိုင်းရောက်တော ကျနော်တို့ သိလိုက်တာက သူက ပွဲစားလို့ သိရတာပေါ့။ သက်ဆိုင်ရာတာဝန်ရှိသူတွေကိုပြောပြီးတော့ အဲဒီငွေကို ပြန်သိမ်းလိုက်ပါတယ်။ ကနဦးက ပေးထားတာ ဘတ် ၅ သိန်း ပေးချေထားတာပါ”ဟုပြောသည်။
သေဆုံးသူမှာ ရခိုင်ပြည်၊ မင်းပြားမြို့နယ်၊ အဝရွာအုပ်စု င/စိုင်းရိုင်းချောင်း- မြစ်နားကျေးရွာနေ၊ အဖ ဦးမြသာထွန်း၊ အမိဒေါ်မတင်ကြည် သားဖြစ်သူ အသက် ၂၆ နှစ်အရွယ်ရှိ ကိုဆန်းဝင်းမောင်ဖြစ်ပြီး အဆိုပါ လူငယ်အတွက် နစ်နာကြေးရရှိရန် ကြိုစားနေကြောင်း ထိုင်းရှိ ရခိုင်လူမှုအဖွဲ့အစည်းများက Western News ကို ပြောသည်။
နစ်နာကြေး ရရှိရေး ရခိုင် နာရေးကူညီမူအသင်း ဘန်ဘော်-ဘန်ကောက် (Rakhine Funeral Association Bang Bon- Bangkok) အဖွဲ့အစည်းမှ တာဝန်ရှိသူများနှင့် လယောင်မြို့ကို သွားနေကြောင်း သေဆုံးသူ ကိုဆန်းဝင်းမောင်၏ အဖညီအစ်ကို တော်စပ်သူ- မင်းပြားမြို့နယ် ဇီးပင်ကြီးကျေးရွာက ကိုခင်မောင်ရွှေ က Western News ကို ယနေ့ နံနက်ပိုင်းတွင် ပြောသည်။
” နစ်နာကြေး ရဖို့အတွက် မဟာချိုင်ကနေ လယောင်မြို့ကို ကျနော် သွားနေပါတယ်။ ကျနော်က ရခိုင်အဖွဲ့အစည်းနဲ့ သွားနေတာပါ။ ကျနော်ကတော့ သေဆုံးသူရဲ့ အဖညီအစ်ကိုပါ။ သေဆုံးသူတွေရဲ့ မိဘကို ကျနော် အဆက်အသွယ်လုပ်ထားပါတယ်။ ကျနော်တို့ဆီကိုတော့ နစ်နာကြေး ပိုက်ဆံ တပြားမှ မရသေးပါဘူး”ဟုပြောသည်။
အခင်းဖြစ်ပွားချိန်တွင် စက်ရုံဖက်မှ အသက်သေဆုံးခဲ့သည့် အလုပ်သမားများ အတွက် နစ်နာကြေးကို လိုက်လျှော့ပေးခြင်း မရှိ၍ အလုပ်သမားများက တောင်းဆို ဆန္ဒပြခဲ့ရာမှ လုပ်ငန်ရှင်ဘက်က လုပ်သားတစ်ဦးကို နစ်နာကြေး ဘတ် ၁၆ သိန်းဖြင့် နှစ်ဖက် ပြေလည်မှု ရရှိခဲ့သည်။
သေဆုံးသူများ၏ နာရေးနှင့် အခြားကိစ္စများအတွက် ဘတ် ၅ သိန်းကို မိသားစုဝင်များထံသို့ လက်ငင်းငွေသား ပေးချေခဲ့ပြီး ကျန် ၁၁ သိန်းကို သုံးလအတွင်း ပေးအပ်မည်ဟု အလုပ်ရှင်ဘက်က သဘောတူခဲ့ကြောင်း ထိုင်းသတင်းဌာနတွင် ဖော်ပြထားသည်။
ဆက်သွယ်လိုသူများ -မြန်မာအလုပ်သမားအရေး ကူညီဆောင်ရွက်ပေးနေသည့် WAG အဖွဲ့ (ကိုမုန်တိုင်း 0626158257)
