မြန်မာ့နိုင်ငံရေးအကျပ်အတည်းကို အာဏာသိမ်း စစ်ကောင်စီက ဖြေရှင်းရာတွင် အာဆီယံဘုံသဘောတူညီချက် ၅ ချက်မှာ အလုပ်မဖြစ်တော့ဘဲ ယင်း သဘောတူညီချက်များကို ကျော်လွန်၍ လမ်းပြမြေပုံသစ်ဖော်ဆောင်ရန် လိုအပ်နေပြီဟု ကုလသမဂ္ဂလူ့အခွင့်အရေးဆိုင်ရာ မဟာမင်းကြီး Volker Turk က ပြောဆိုလိုက်သည်။
ဇွန်လ ၁၈ ရက်နေ့ ကျင်းပပြုလုပ်သည့် ကုလသမဂ္ဂ၏ ၅၆ ကြိမ်မြောက် လူ့အခွင့်အရေး ကောင်စီ အစည်းအဝေးတွင် Volker Turk က ယင်းကဲ့သို့ ထုတ်ဖော်ပြောဆိုလိုက်ခြင်းဖြစ်သည်။
မြန်မာနိုင်ငံတွင် အကြမ်းဖက်မှုများကို တားဆီးရန် (သို့မဟုတ်) ဒီမိုကရေစီ ပြန်လည်ထူထောင်ရန် အာဆီယံက ပျက်ကွက်ခဲ့ကြောင်း၊ ထို့ကြောင့် မြန်မာ့အရေး ဖြေရှင်းရေးအတွက် ချမှတ်ထားသည့် အာဆီယံဘုံသဘောတူညီချက် ၅ ချက် မူဘောင်ကနေ ကျော်လွန်ဖို့ အချိန်တန်နေပြီဖြစ်ကြောင်း ၎င်းက ပြောဆိုသည်။
“အာဆီယံရဲ့ ကြိုးပမ်းအားထုတ်မှုတွေဟာ မြန်မာနိုင်ငံရဲ့ ကံကြမ္မာကို မြန်မာပြည်သူတွေထံ ပြန်လည် ပေးအပ်နိုင်မယ့် လမ်းပြမြေပုံသစ် ဖော်ဆောင်ဖို့အတွက် ဩဇာကြီးမားတဲ့ နိုင်ငံတွေရဲ့ ပေါင်းစုအားတစ်ရပ်ကို ကျောထောက်နောက်ခံပြုပြီး အားသစ်လောင်းရမှာပါ။ မြန်မာပြည်သူတွေ စားပှဲ၀ိုငျးမှာ နေရာရှိရပါမယ်။ ဆိုလိုတာက ဒီမိုကရေစီလှုပ်ရှားမှုတွေနဲ့ လူငယ်တွေဆီ အရောက် လှမ်းဖို့၊ အခုအကျပ်အတည်းကို ဖြေရှင်းရာမှာ သူတို့တွေ အဓိပ္ပာယ်ပြည့်၀စွာ ပါဝင်ပတ်သက်ကြဖို့ပါ” ဟု Volker Turk က ပြောသည်။
မြန်မာပြည်သူများ၏ ပိုမိုကောင်းမွန်သော မနက်ဖြန်အတွက် ယခုလက်ရှိ အခြေအနေမှ ပိုမိုအာရုံစိုက်မှု၊ ပိုမိုရင်းနှီးမြုပ်နှံမှု၊ ပိုမိုထက်သန်သော နိုင်ငံရေးစိတ်ဆန္ဒ၊ ပိုမိုလုပ်ဆောင်မှုများ ပေါင်းစပ်၍ ပြောင်းလဲမှုများ ဆောင်ကျဥ်းရန် ကုလသမဂ္ဂလူ့အခွင့်အရေးဆိုင်ရာ မဟာမင်းကြီး Volker Turk က တိုက်တွန်းပြောဆိုနေသည်။
