ရက်ပေါင်း ၂၀ ကျော် ဆက်တိုက်ရွာသွန်းနေသော မိုးကြောင့် လေးမြို့မြစ်ရေတက်ပြီး မြောက်ဦးမြို့နယ်တခွင်မှာ ရေကြီးရေလျှံဖြစ်ပေါ်နေကြောင်း ဒေသခံများထံမှ သိရသည်။
လေးမြို့မြစ်ရေ စိုးရိမ်ရေမှတ်ထက် ကျော်လွန်ပြီး လေးမြို့မြစ်ကမ်းရှိ ကျေးရွာပေါင်း ၆၀ ကျော် ရေဘေးကြုံတွေ့နေရသည်ဟု ပန်းမြောင်းဒေသခံတစ်ဦးက ပြောသည်။
” မနေ့ညက တစ်ရက်တည်းမှာ ရေက ကြီးသွားတာ။ မိုးက ရွာနေတာ ရက် ၂၀ ကျော်ပြီ။ လုံးဝ မတန့်သေးဘူး။ အခုလည်း မိုးက အရမ်းသည်းနေတယ်။ ပန်းမြောင်း ဈေးပိုင်းမှာ ကမ်းပြိုလို့ နေအိမ် ၃၀ လောက် ပါသွားတယ်။ လူတွေတော့ အထိအခိုက်မရှိဘူး။ အိမ်တွေက အားလုံး ပါသွားပြီ။ ” ဟု ပြောသည်။
မြောက်ဦးမြို့ထဲက အနိမ့်ပိုင်းရှိ ရပ်ကွက်အချို့သို့လည်း ရေဝင်ရောက်နေပြီး ဆင်ချဆိပ်ရပ်ကွက်က နေအိမ်အချို့ ရေနစ်မြှုပ်သွားပြီဟု မြို့ခံများက ပြောသည်။
” ဆင်ချဆိပ်ရပ်ကွက်က ချောင်းကမ်းနားပိုင်းက အိမ်တွေ ရေနစ်မြှုပ်သွားပြီ။ မိုးကလည်း အရမ်းရွာနေတာ။ ရေကလည်း တက်လာနေတယ်။ လူတွေက အခု အမြင့်ပိုင်းတွေကို ပြောင်းရွှေ့နေရတယ်။ ၂၀၁၅ ခုနှစ်ကလိုမျိုး တစ်မြို့နယ်လုံး ရေကြီးဖို့ကို စိုးရိမ်နေတယ်။ ” ဟု ပြောသည်။
ပြီးခဲ့သည့် ၂၀၁၅၊ ၂၀၁၆ ခုနစ်ကလည်း လေးမြို့မြစ်ရေနှင့် မိုးရွာသွန်းမှုကြောင့် မြောက်ဦးတစ်မြို့နယ်လုံး ရေဘေးကြုံတွေ့ခဲ့ရပြီး လယ်ယာမြေ အများအပြားပျက်စီးသွားသည့်အပြင် လူအသေအပျောက်လည်း ရှိခဲ့သည်။
ကုန်ခဲ့သည့် ၂၀၂၃ ခုနှစ်ကလည်း လေးမြို့မြစ်ရေကြောင့် မင်းပြားမြို့နယ်နှင့် မြောက်ဦးမြို့နယ် အစပ်ရှိ ပန်းမြောင်းကျေးရွာမှာ ရေဘေးကြုံတွေ့ခဲ့ရပြီး လယ်ယာမြေများနှင့် ကမ်းပြို၍ နေအိမ်အချို့ ပျက်စီးခဲ့ရသည်။
