တိုက်ပွဲပြင်းထန်နေသော သံတွဲမြို့နယ် မောင်ရွှေလေးရေတပ်စခန်းနှင့် ဂွမြို့နယ် ကျိန္တလီမြို့သိမ်းတိုက်ပွဲအတွင်း အာဏာသိမ်း စစ်ကောင်စီ၏ စစ်သင်္ဘော ၈ စီးကို အာရက္ခတပ်တော် AA က ရင်ဆိုင်တိုက်ခိုက်နေရသည်ဟု ယမန်နေ့ ထုတ်ပြန်ချက်အရ သိရသည်။
မောင်ရွှေလေးရေတပ်နှင့် ကျိန္တလီမြို့အနီး ကျောက်ပါးစပ်ကျေးရွာအနီးတွင် စစ်ကောင်စီတပ်ဖွဲ့ဝင်များနှင့် တိုက်ပွဲပြင်းထန်စွာဖြစ်ပွားနေကြောင်း AA က ယမန်နေ့ ဩဂုတ်လ ၂၆ ရက်တွင် ထုတ်ပြန်ထားသည်။
အဆိုပါ တိုက်ပွဲဖြစ်ပွားရာ နေရာများသို့ အာဏာသိမ်းစစ်ကောင်စီသည် စစ်သင်္ဘော ၈ စီးဖြင့် ရေကြောင်းမှ လူအင်အား၊ လက်နက်အင်အား ဖြည့်တင်းပေးနေသည့်အပြင် လက်နက်ကြီးများဖြင့် ဆက်တိုက်ပစ်ခတ်တိုက်ခိုက်နေပြီး အာရက္ခတပ်တော် AA ကလည်း ပြန်လည်တိုက်ခိုက်နေကြောင်း သိရသည်။
သံတွဲမြို့ပေါ်နှင့် ငပလီမြို့ကို အာရက္ခတပ်တော် AA က ထိန်းချုပ်ထားပြီး တစ်ခုတည်းကျန်ရှိနေသေးသော မောင်ရွှေလေးရေတပ်ကို သိမ်းပိုက်နိုင်ရေး ကြိုးပမ်းဆောင်ရွက်နေသည်။
ဆက်လက်ပြီး ဂွမြို့နယ်တစ်ခုလုံးအား သိမ်းပိုက်နိုင်ရေး AA ထိုးစစ် ကျိန္တလီမြို့သို့ ရောက်ရှိလာကာ လက်ရှိတွင် ကျိန္တလီမြို့အနီးအနားတွင် စစ်ကောင်စီနှင့်တိုက်ပွဲ ပြင်းထန်လျှက်ရှိကြောင်း AA က ဆိုသည်။
တစ်ဆက်တည်းမှာ အာဏာသိမ်း စစ်ကောင်စီသည် ဂွပင်လယ်ပြင်ကနေ စစ်သင်္ဘောများဖြင့် AA ထိုးစစ်ကို လေကြောင်းပစ်ကူနှင့်အတူ ခုခံနေပြီး ဂွ-ကျိန္တလီမြို့ကြားရှိ အရေးပါသော တံတား အနည်းဆုံး ၄ စင်းထက်မနည်းကို မိုင်းခွဲဖျက်ဆီးရန် ပြင်ဆင်ထားကြောင်း စစ်ရေးသတင်းရင်းမြစ်များက Western News ကို ပြောဆိုထားကြသည်။
နှစ်ဖက်ထိတွေ့တိုက်ပွဲများ ပြင်းထန်လျှက်ရှိနေသေး၍ ဂွမြို့ခံများနှင့် ကျိန္တလီမြို့ခံများမှာ ဘေးလွတ်ရာနေရာများနှင့် ဧရာဝတီဘက်သို့ စစ်ရှောင်သွားကြပြီး ဧရာဝတီရောက် ရခိုင်စစ်ရှောင်များအပေါ် စစ်ကောင်စီအုပ်ချုပ်ရေးအဖွဲ့ဝင်များက ဧည့်စာရင်းအကြောင်းပြ၍ ငွေညှစ်တောင်းယူခြင်းများရှိနေကြောင်း စုံစမ်းသိရသည်။
