ရှမ်းပြည်နယ်မြောက်ပိုင်း၊ နောင်ချိုမြို့နယ်၊ တောင်ခမ်းကျေးရွာရှိ စစ်ကောင်စီ၏ အမြောက်တပ်များဖြစ်သည့် ၂၀၆၊ ၃၅၄၊ ၄၀၆ ၊ ၉၀၂ တပ်များကို တိုက်ခိုက်သိမ်းပိုက်ရေး တိုက်ပွဲတွင် TNLA က စစ်ကောင်စီတပ်၏ သံချပ်ကာများကို အသုံးပြုနေပြီး လက်နက်နှင့်အလောင်းများ သိမ်းဆည်းရရှိသည့် မှတ်တမ်းများကို ယမန်နေ့ စက်တင်ဘာလ ၄ ရက်နေ့က ထုတ်ပြန်သည်။
တောင်ခမ်းတွင် အမြောက်တပ်ရင်း ၄ ခုရှိသည့်အနက်မှ အမြောက်တပ် ၄၀၆ နှင့် အမြောက်တပ် ၂၀၆ တို့ကို သြဂုတ်လ ၂၈ ရက်နေ့တွင် TNLA က သိမ်းပိုက်နိုင်ခဲ့ပြီး ကျန်ရှိသော အမြောက်တပ် ၃၅၄ နှင့် အမြောက်တပ် ၉၀၂ တပ်တို့ကို သိမ်းပိုက်နိုင်ရေး ဆက်လက် တိုက်ခိုက်နေကြောင်း ဆိုသည်။
၁၀၂၇ စစ်ဆင်ရေး ဒုတိယပိုင်း တောင်ခမ်းတိုက်ပွဲရုပ်သံမှတ်တမ်းမှာ စက်တင်ဘာ ပထမပတ်အတွင်း စစ်ဦးစီးမှူး ဒုတိယဗိုလ်မှူးကြီးတားမဝေါနှင့် တပ်မဟာမှူး ၆ ဒုတိယဗိုလ်မှူးကြီး တာမောရှန်တို့ ဦးဆောင်၍ ကျောက်မဲ နှင့် နောင်ချိုမြို့နယ် တောင်ခမ်းရွာအုပ်စု ရှိ စစ်ကောင်စီ၏ အမြောက်တပ် ၂၀၆၊ ၃၅၄၊ ၄၀၆ ၊ ၉၀၂ တွင် ဖြစ်ပွားနေသော တိုက်ပွဲမှတ်တမ်းဖြစ်ကြောင်း ထုတ်ပြန်ခဲ့သည်။
ထိုတောင်ခမ်းတိုက်ပွဲ ရုပ်သံမှတ်တမ်းတွင် သေဆုံးနေသော စစ်ကောင်စီတပ်များ၏ အလောင်းများနှင့် သိမ်းဆည်းရရှိသော လက်နက်များကို ထုတ်ပြန်ထားပြီး တော်လှန်ရေးတပ်များဘက်မှလည်း အထိအခိုက် အကျအဆုံးများရှိနေကြောင်း ရှေ့တန်းသတင်းရင်းမြစ်တချို့က ပြောဆိုသည်။
