Western News| အောက်တိုဘာ ၂၅
စစ်ကောင်စီ၏ ပြည်ထောင်စုရွေးကောက်ပွဲကော်မရှင် UEC ဘက်မှ ရခိုင်အမျိုးသားပါတီ ANP အား မှတ်ပုံတင်ခွင့် မချပေးသေးခြင်းမှာ မည်သသည့် အကြောင်းရင်းကြောင့် ဖြစ်သည်ကို မသိရှိရဟု ရခိုင်အမျိုးသာပါတီမှ တာဝန်ရှိသူများက ပြောသည်။
ပြည်ထောင်စုရွေးကောက်ပွဲကော်မရှင်မှ ပြီးခဲ့သည့် ဇန်နဝါရီလက ချမှတ်ခဲ့သည့် နိုင်ငံရေးပါတီများ မှတ်ပုံတင်ခြင်း နည်းဥပဒေသစ်အရ ပါတီများပြန်လည်မှတ်ပုံတင်ကြရရာ မှတ်ပုံခွင့်လျှောက်သည့်ပါတီ ၆၄ ပါတီရှိခဲ့ပြီး ထိုအထဲမှ လက်ရှိ ၃၆ ပါတီကို မှတ်ပုံတင်ခွင့်ပြုထားပြီဖြစ်ကြောင်း UEC မှထုတ်ပြန်ထားသည်။
မှတ်ပုံတင်ခွင့် မကျသေးသည့် ကျန် ၂၈ ပါတီထဲတွင် ရခိုင်ပြည်မှ အင်အားကြီးပါတီတစ်ခု ဖြစ်သည့် ANP လည်း ပါဝင်နေခြင်းဖြစ်ပြီး မည်သည့်အတွက်ကြောင့် မှတ်ပုံတင်ခွင့် မချပေးသည် ဆိုသည်ကို မသိရှိရဟု ပါတီမူဝါဒရေးရာ ဦးဆောင်ကော်မတီဝင်တစ်ဦးဖြစ်သူ ဦးဘရှိန်က ပြောသည်။
“ဒါကတော့ UEC နဲ့ပဲ သက်ဆိုင်တာ။ သူတို့မှာပဲ လုပ်ပိုင်ခွင့်ရှိတဲ့အတွက် သူတို့ချပေးမှပဲ ကျလာမှာ။ ဒီဖက်ကတော့ နိုင်ငံရေးပါတီ ဥပဒေသစ်အတိုင်း မှတ်ပုံတင်ခဲ့တယ်။ သူတို့ပေးထားတဲ့ ပုံစံအတိုင်းပဲ ပြည့်ပြည်စုံစုံ လုပ်ဆောင်ပေးခဲ့ပြီ။ သူများတွေက ပါတီဆက်လက်ရပ်တည်ခွင့်ရပြီ ကျနော်တို့က ဘာလို့မရသေးလဲဆိုပြီး UEC ကို အခါအား လျော်စွာမေးပေမယ့်လည်း စီစစ်နေပါတယ် ဆိုတာလောက်ပဲဖြေတယ်။ ဘာလိုအပ်ချက်ရှိလဲဆိုတာမပြောဘူး “ဟုပြောသည်။
ပါတီ ဆက်လက်ရပ်တည်ခွင့် အတွက် နိုင်ငံရေးပါတီ ဥပဒေသစ်အတိုင်း ရခိုင်မှ ရခိုင်အမျိုးသားဖွံ့ဖြိုးတိုးတက်ရေး ပါတီ၊ ရခိုင့်ဦးဆောင်ပါတီ၊ မြိုတိုင်းရင်းသားဖွံ့ဖြိုးတိုးတက်ရေးပါတီ၊ မြိုတိုင်းရင်းသားပါတီ၊ ရခိုင်ပြည်နယ်အမျိုးသားအင်အားစုပါတီနှင့် ခမီအမျိုးသားဖွံ့ဖြိုးတိုးတက်ရေပါတီတို့ မှတ်ပုံတင်ခွင့်လျှောက်ထားခဲ့ကြရာ ထိုအထဲမှ ANP ပါတီတစ်ခုကိုသာ မှတ်ပုံတင်ခွင့် ချမပေးသေးခြင်း ဖြစ်သည်။
မှတ်ပုံတင်ခွင့်ပြုရန်မှာ ပြည်ထောင်စုရွေးကောက်ပွဲကော်မရှင်၏ အလုပ်ဖြစ်ပြီး မှတ်ပုံတင်ခွင့်အတွက် လိုအပ်ချက်ရှိသည်များကို ပြောဆိုလာပါက ဖြည့်ဆည်းပေးရမည်ပင်ဖြစ်သည်ဟု ဦးဘရှိန်ကဆက် ပြောသည်။
“မှတ်ပုံတင်ရမယ်ဆိုလို့ တင်ထားပြီ။ ခွင့်ပြုရမှာကသူတို့အလုပ်ပဲပေါ့။ ဘာတွေလိုအပ်ချက်ရှိတယ်လို့ ပြောလာရင်လည်း ဒီဖက်ကဖြည့်ဆည်းပေးမှာပါ။ ကြာလည်းကြာနေပြီ။ ANP တစ်ခုတည်းကိုပဲ မှတ်ပုံတင်ခွင့် ချမပေးသေးတာတော့ မဟုတ်ဘူး။ ၃ လပိုင်းလောက်ကနေ မှတ်ပုံတင်ခွင့်လျှောက်ထားတာဆိုတော့ ကြာတော့ ကြာနေပြီ ” ဟုပြောသည်။
UEC မှ နေ၍ ယခုကဲ့သို့ ပါတီမှတ်ပုံတင်ခွင့်မချပေးသေးခြင်းကြောင့် နိုင်ငံရေးလှုပ်ရှားမှုများနှင့် ပြည်တွင်းပြည်ပ မှဖိတ်ကြားသည့် ပွဲများကို တက်ရောက်ခြင်းတို့ ရပ်တန့်ထားရသည်ဟု ရခိုင်အမျိုးသားပါတီ ANP မှ ဥက္ကဋ္ဌ ဦးသာထွန်းလှက ပြောသည်။
စစ်ကောင်စီ၏ ပြည်ထောင်စု ရွေးကောက်ပွဲကော်မရှင်မှ မှတ်ပုံတင်ခွင့် ချမပေးသည့် ပါတီများထဲတွင် ရခိုင့်အမျိုးသားပါတီ ANP အပြင် တစ်ခြားတိုင်းရင်းသားပါတီများဖြစ်သည့် ဓနုအမျိုးသားအဖွဲ့ချုပ်ပါတီ၊ မွန်ညီညွတ်ရေးပါတီ၊ ကချင်အမျိုးသား ကွန်ဂရက်ပါတီနှင့် တစ်ခြား ပြည့်သူပါတီ၊ ပြည်ထောင်စုငြိမ်းချမ်းရေးနှင့် ညီညွတ်ရေးပါတီတို့လည်း ပါဝင်ပြီး စုစုပေါင်း ၂၈ ပါတီ ခန့်ကျန်နေသေးကြောင်း သိရသည်။
Western News-WN
