ရက္ခိုင့်တပ်တော် AA သိမ်းပိုက်ထားသော မြို့နယ်များကို စစ်ကောင်စီက လေကြောင်းဖြင့် နေ့ညပါမကျန် ဗုံးကြဲတိုက်ခိုက်မှုကြောင့် အရပ်သားပြည်သူများမှာ သေဆုံးမှုများ မြင့်တက်လာနေပြီး ပြည်သူများမှာ စိုးရိမ် ထိတ်လန့်မှုများ ဖြစ်နေကြရသည်။

ပလက်ဝ၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ပေါက်တော၊ မြေပုံ၊ ရမ်းဗြဲ၊ ရသေ့တောင်၊ တောင်ပြိုစသော မြို့များကို ရက္ခိုင့်တပ်တော် AA က သိမ်းပိုက်ထားပြီး ကျန်ရှိနေသည့်မြို့များကို တစိတ်ဒေသ သိမ်းပိုက်ထားသည်။

ယင်းကဲ့သို့ စစ်ကောင်စီက ဗုံးကြဲတိုက်ခိုက်နေမှုကြောင့် အရပ်သားပြည်သူများမှာ နေ့စဉ်ရက်ဆက် သေဆုံးမှုများ မြင့်တက်လာနေပြီး လက်ရှိတွင်လည်း ပြည်သူများမှာ ထိတ်လန့်နေရကာ ကျီးလန့်စာစား ဖြစ်နေရကြောင်း မင်းပြားမြို့နယ် ဒေသခံတစ်ဦးက ပြောသည်။

"ဒရုန်းတွေ၊ ဂျက်တိုက်လေယာဉ်တွေက နေ့ည မကျန် ဝဲပါတယ်။ ပြီးခဲ့တဲ့ ခုရက်ပိုင်းကဆို င/စိုင်းရိုင်းချောင်းဖက်ကို ပေါင်း ၅၀၀ ရှိတဲ့ ဗုံးကြဲချခဲ့ပါတယ်။ သုံးယောက်ထက်မနည်းသေတယ်။ ပြီးတော့ သာဒေမွတ်ဆလင်ကျေးရွာမှာဆိုရင် ဗုံးချသွားတာ ကျေးရွာကလေးတွေ မကျန် ၃၀ နီးပါး သေတယ်။ ကျမတို့ ပြည်သူတွေက အခုဆိုရင် ထိတ်လန့်ကြောက်နေရပြီး ကျီးလန့်စာစား ဖြစ်နေပါပြီ။ ဘယ်နေ့ ကိုယ့်ဆီကို အလှည့်ကျမလဲဆိုတာ တွေးပြီး ကြောက်နေရတယ် "ဟုပြောသည်။

၂၀၂၃ နိုဝင်ဘာလ ၁၃ ရက်နေ့မှ ၂၀၂၄ မတ်လ ၂၁ ရက်နေ့အထိ ရခိုင်ပြည် စစ်ပွဲအတွင်း အပြစ်မဲ့အရပ်သားပြည်သူ ၁၇၉ ဦး သေဆုံးခဲ့ရပြီး သေဆုံးသူ ၁၇၉ ဦးထဲတွင် အမျိုးသမီး ၆၄ ဦးနှင့် အမျိုးသား ၁၁၅ ဦးပါဝင်ကြောင်း ULA/AA ၏ HDCO က ဧပြီလ ၄ ရက်နေ့တွင် ထုတ်ပြန်ထားသည်။

ယင်းအထဲတွင် မင်းပြားမြို့နယ် ခြိမ်တောင်အုပ်စု သာဒေ မွတ်ဆလင်ကျေးရွာကို စစ်ကောင်စီက မတ်လ ၁၈ ရက် နံနက် ၁ နာရီအချိန်တွင် ဗုံးကြဲတိုက်ခိုက်ခဲ့၍ မွတ်ဆလင် ၂၁ ဦးသေဆုံးကာ ၁၅ ဦးထက်မနည်း ပြင်းထန်ဒဏ်ရာများ ရရှိခဲ့သည်။

အသက် ၃၀ အရွယ် သာဒေ မွတ်ဆလင်ကျေးရွာက အမျိုးသမီးတစ်ဦးက "ကျမတို့ကတော့ ရွာမှာ မအိပ်ရဲတော့ပါဘူး။ ရွာနဲ့ဝေးတဲ့နေရာတွေမှာပဲ အိပ်နေရတယ်။ လူတော်တော်များများလည်းရွာတွေမှာ မနေရဲကြတော့ဘူးလေ။ နေ့တိုင်းလာပြီးတော့ လေကြောင်းက ဗုံးကြဲတာတွေ၊ ဒရုန်းနဲ့ပစ်ချနေတာတွေ လုပ်တော့ ကိုယ့်မျက်စီရှေ့မှာ လူတွေ သေဆုံးနေရတယ်။ အဲဒါတွေ မြင်နေရတော့ ဘေးလွတ်ရာမှာ သွားအိပ်နေရတာပေါ့ "ဟုပြောသည်။

အလားတူ ပြီးခဲ့သည့် ဧပြီလ ၂ရက်နေ့နှင့် ၃ ရက်နေ့ နံနက်ပိုင်းတို့တွင် မင်းပြားမြို့နယ် င/စိုင်းရိုင်းချောင်းနှင့် မြေပုံမြို့နယ် ကမ်းထောင်းကြီးကို စစ်ကောင်စီက လေကြောင်းမှ ပစ်ခတ်မှုကြောင့် အရပ်သား ၆ ဦးသေဆုံးခဲ့ပြီး ၁၇ ဦး ပြင်းထန် ဒဏ်ရာရရှိခဲ့သည်။

စစ်ကောင်စီက ယင်းလုပ်ရပ်သည် ရခိုင်ပြည်ရှိ အရပ်သား ပြည်သူများကို ရည်ရွယ်ချက်ရှိရှိ လူမျိုးတုံး သတ်ဖြတ်နေခြင်း ဖြစ်ကြောင်း ရခိုင့်လူ့အခွင့်အရေးမြှင့်တင်သူများအဖွဲ့၏ ဒါရိုက်တာ ဦးမြတ်ထွန်းက ပြောသည်။

"စစ်ကောင်စီက ရခိုင်မှာ စစ်ရှုံးနေတာကို ဝန်ခံတာမရှိဘူး။ AA ဆီမှာစစ်ရှုံးနေတာကို ရှုံးမဲမဲပြီးတော့ အရပ်သားပြည်သူတွေ နေထိုင်တဲ့ နေရာတွေကို ရည်ရွယ်ချက်ရှိရှိ ပစ်ခတ်မှုတွေ တစ်လျှောက်လုပ်နေတယ်။ ပေါင် ၃၀၀ ရှိတဲ့ ဗုံးတွေ၊ ပြီးတော့ ပေါင် ၅၀၀ ရှိတဲ့ ဗုံးတွေနဲ့ ပစ်ချတယ်။ ဒါက ရည်ရွယ်ချက်ရှိရှိ လူမျိုးတုံး သတ်ဖြတ်နေတာဖြစ်တယ်။ ကျနော်တို့ဆီမှာ အထောက်အထားတွေ အပြည့်အစုံရှိပါတယ်။ နိုင်ငံတကာက အရေးယူနိုင်တဲ့အထိ ကျနော်တို့ ဆောင်ရွက်သွားမှာပါ"ဟုပြောသည်။

အာဏာသိမ်းနောက်ပိုင်း နွေဦးတော်လှန်ရေးကာလအတွင်း သေဆုံးခဲ့ရသည့် ဒီမိုကရေစီရေးလှုပ်ရှားသူများနှင့် ပြည်သူ စုစုပေါင်းမှာ ၄၈၅၂ ဦး ရှိခဲ့ပြီဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ဧပြီလ ၅ ရက်နေ့တွင် ထုတ်ပြန်ထားသည်။

ထို့အပြင် ဖမ်းဆီးခံခဲ့ရသူ စုစုပေါင်း ၂၆၄၈၃ဦးရှိပြီး ထိုအထဲမှ ၂၀၃၁၀ ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ ၈၉၀၇ ဦးမှာ ထောင်ဒဏ်ချမှတ်ခံထားရကြောင်း အဆိုပါ ထုတ်ပြန်ချက်တွင် ရေးသားထားသည်။

ရခိုင်ပြည် ဘူးသီးတောင်မြို့သိမ်းတိုက်ပွဲတွင် ရက္ခိုင့်တပ်တော် AA ၏ စစ်မယ်များကပါ ပါဝင်တိုက်ခိုက်လာကြောင်း AA က ဓါတ်ပုံနှင့်တကွ ထုတ်ပြန်လာသည်။ 

ယမန်နေ့ ဧပြီလ ၅ ရက် နံနက် ၈ နာရီက အပြီးသတ်သိမ်းပိုက်ခဲ့သော ဘူးသီးတောင်မြို့က စစ်ကောင်စီ၏ ခမရ ၅၆၄ တပ်ရင်းဌာနချုပ်အား တိုက်ခိုက်ရာတွင် စစ်မယ်များပါ ပါဝင်တိုက်ခိုက်ခဲ့ကြောင်း AA က ပုံနှင့်တကွ ထုတ်ပြန်ခဲ့ခြင်းဖြစ်သည်။ 

ခမရ ၅၆၄ သည် ဘူးသီးတောင်မြို့၏ အရေးပါသော တပ်ရင်းဌာနချုပ်တစ်ခုဖြစ်ပြီး စကခ (၁၅) လက်အောက်ခံဖြစ်သည်။ 

စစ်ကောင်စီ၏ အရေးပါသော စကခ (၁၅) လက်အောက်ခံ ခမရ ၅၆၄ တပ်ရင်းဌာနချုပ်အား ဧပြီလ ၁ ရက်နေ့ စတင်တိုက်ခိုက်ခဲ့ပြီး ၅ ရက်အကြာတွင် AA က အပြီးသတ်သိမ်းပိုက်နိုင်ခဲ့ခြင်းဖြစ်သည်။ 

အဆိုပါ စခန်းသိမ်းတိုက်ပွဲတွင် ပေးဆပ်စွန့်လွှတ်ခဲ့သော အာရက္ခစစ်သည်တော်များအား ရက္ခိုင့်တပ်တော် AA စစ်ရုံးချုပ်မှ လေးနက်စွာ မှတ်တမ်းတင် ဂုဏ်ပြုအပ်ကြောင်း AA က ထုတ်ပြန်သည်။ 

သို့သော်လည်း အဆိုပါ တိုက်ပွဲအတွင်း စစ်ကောင်စီတပ်သား ၈၀ ကျော် သေဆုံးသွားပြီး လက်နက်ခဲယမ်းများ၊ စစ်အသုံးအဆောင်ပစ္စည်း အများအပြားကို သိမ်းဆည်းရမိခဲ့သည်ဟု ရက္ခိုင့်တပ်တော် AA က ဆိုသည်။ 

ဆက်လက်ပြီးလည်း ဘူးသီးတောင်မြို့က စစ်ကောင်စီ၏ တပ်ရင်းတပ်ဖွဲ့များနှင့် စစ်စခန်းများအားလုံးကို အပြီးသတ်သိမ်းပိုက်နိုင်ရေးအတွက် ဆက်လက် ထိုးစစ်ဆင်တိုက်ခိုက်နေကြောင်း AA က ထုတ်ပြန်ပြောသည်။ 

အလားတူ မောင်တောမြို့နယ် ကြိမ်ချောင်းစစ်စခန်းကိုလည်း အပြီးသတ်သိမ်းပိုက်နိုင်ရေးအတွက် ဆက်လက်ထိုးစစ်ဆင်တိုက်ခိုက်နေကြောင်း AA က ဆိုသည်။ 

ရခိုင်ဒေသ၌ အာဏာသိမ်း စစ်ကောင်စီသည် ပြည်သူကိုပစ်မှတ်ထားလျက် စာသင်ကျောင်းများ၊ ဆေးရုံများ၊ ဈေးများ၊ စစ်ဘေးရှောင်နေရာများ၊ ဘာသာရေးအဆောက်အအုံများ၊ မြို့ရွာများရှိ လူနေရပ်ကွက်များကို လေယာဉ်ဖြင့် ဗုံးကြဲခြင်း၊ လက်နက်ကြီးများဖြင့် ပစ်ခတ်ခြင်းတို့ကို နေ့စဉ်ပြုလုပ်ကာ စစ်ရာဇဝတ်မှုများကို ကျူးလွန်လျက်ရှိကြောင်း AA ပြောသည်။

တိုက်ပွဲများပြင်းထန်နေသော ရခိုင်ပြည်အရေး တည်ငြိမ်အေးချမ်းမှုရှိစေရန် အာဏာသိမ်း စစ်ကောင်စီနှင့် ရက္ခိုင့်တပ်တော် AA တို့ကြား စေ့စပ်ညှိနှိုင်းပေးမည်ဟု တရုတ်အစိုးရက ကုလအစည်းအဝေးတွင် ဧပြီလ ၄ ရက်နေ့က ပြောကြားခဲ့သည်။ 

ထိုသို့ ကြားဝင်စေ့စပ်ညှိနှိုင်းပေးနိုင်ရန် တရုတ်အစိုးရကိုယ်စားလှယ်အဖွဲ့သည် မြန်မာနိုင်ငံသို့ ရောက်ရှိနေပြီဖြစ်ကြောင်း ပြောကြားခဲ့ပြီးနောက် မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai ဦးဆောင်သောအဖွဲ့သည် AA နှင့် မညှိနှိုင်းခင် ယမန်နေ့ ဧပြီလ ၅ ရက်နေ့တွင် အာဏာရှင်ဟောင်း ဦးသန်းရွှေအပါအဝင် စစ်ခေါင်းဆောင်များဖြင့် တွေ့ဆုံခဲ့သည်။ 

မြန်မာ့နှစ်သစ်ကူးအကြို ခေါင်းစဉ်ဖြင့် သံအမတ်ကြီး Mr. Chen Hai အဖွဲ့သည် အာဏာရှင်ဟောင်း ဦးသန်းရွှေ၊ ယခင်သမ္မတဟောင်း ဦးသိန်းစိန်နှင့် အာဏာရှင်ဟောင်း ဦးမောင်အေးတို့ကို နေပြည်တော်တွင် သွားရောက်တွေ့ဆုံခဲ့သည်။ 

အဆိုပါတွေ့ဆုံမှုများတွင် မြန်မာ-တရုတ် နှစ်နိုင်ငံ ပိုမိုချစ်ခင်ရင်းနှီးရေး၊ ဖွံ့ဖြိုးတိုးတက်ရေးနှင့် နယ်စပ်ဒေသအပါအဝင် မြန်မာနိုင်ငံအတွင်း တည်ငြိမ်အေးချမ်းရေးတို့ကို ဆွေးနွေးခဲ့သည်ဟု တရုတ်အစိုးရက ထုတ်ပြန်ပြောဆိုထားသည်။ 

ယင်းအပြင် နှစ်နိုင်ငံ နယ်စပ်ဒေသတစ်လျှောက် အွန်လိုင်းငွေလိမ်ဂိုဏ်းများကို နှိမ်နင်းရေးကိုလည်း ဆွေးနွေးခဲ့ပြီး ရခိုင့်အရေးကိုမူ အထူးအလေးထား ဆွေးနွေးခဲ့ခြင်းမရှိခဲ့ပေ။ 

သို့သော် တိုက်ပွဲများ ပြန်လည်ပြင်းထန်စွာဖြစ်ပွားနေသည့် ရခိုင်ဒေသတွင် မြေပြင်အခြေအနေ အမြန်ဆုံးတည်ငြိမ်စေရန်အတွက် တရုတ်နိုင်ငံက အပြုသဘောဆောင်သော အခန်းကဏ္ဍမှ ဆက်လက်ပါဝင်သွားမည်ဟု ကုလားအစည်းအဝေးတွင် ကတိပြုထားကြောင်း သိရသည်။ 

အာဏာသိမ်းစစ်ကောင်စီနှင့် ရက္ခိုင့်တပ်တော်တို့ကြား ဝင်ရောက်စေ့စပ်ညှိနှိုင်းပေးမည်ဟု တရုတ်အစိုးရပြောဆိုချက်ကို အာဏာသိမ်း စစ်ကောင်စီဘက်ကလည်း တစ်စုံတစ်ရာ ထုတ်ဖော်ပြောဆိုခြင်းမရှိသလို AA ကလည်း သဘောထားမှတ်ချက်များ ထုတ်ဖော်ပြောဆိုခြင်းမရှိသေးပေ။ 

တရုတ်အစိုးရက ယခုအချိန်တွင် ရခိုင်အရေးကို ပိုအလေးထား အာရုံစိုက်လာခြင်းမှာ ရက္ခိုင့်တပ်တော် AA ၏ ထိုးစစ်များ တရုတ်အကျိုးစီးပွားများစွာရှိသော ကျောက်ဖြူမြို့နှင့် အမ်းမြို့သို့ ရောက်ရှိလာခြင်းဖြစ်၍ ၎င်းတို့အကျိုးစီးပွား မထိခိုက်စေရေးအတွက် ကြားဝင်စေ့စပ်ညှိနှိုင်းပေးရန် ရောက်ရှိလာခြင်းဖြစ်သည်ဟု သုံးသပ်သူများက ပြောဆိုနေကြသည်။ 

ရက္ခိုင့်တပ်တော် AA အနေဖြင့် မိမိ၏ ပန်းတိုင်းရည်မှန်းချက်များကိုသာ အဓိကအလေးထား အာရုံစိုက်သင့်ပြီး ရခိုင်ပြည်အတွင်းက စစ်ကောင်စီ တပ်စခန်းများအားလုံး အမြစ်ပြတ်တိုက်ခိုက်ရေးကို ပိုအရေးပေးရန်နှင့် တရုတ်၏ ကြားဝင်စေ့စပ်ညှိနှိုင်းမှုကို သတိထားရန် ရခိုင်ပြည်သူများက AA ကို အလေးအနက် တိုက်တွန်းနေကြသည်။ 

ဧပြီလ ၁ ရက်နေ့က စတင်တိုက်ခိုက်ခဲ့သည့် ရခိုင်ပြည် ဘူးသီးတောင်မြို့က စစ်ကောင်စီ၏ ခမရ ၅၆၄ တပ်ရင်းဌာနချုပ်ကို ရက္ခိုင့်တပ်တော် AA မှ ဧပြီလ ၅ ရက်နေ့တွင် အပြီးသတ်သိမ်းပိုက်နိုင်ခဲ့ကြောင်း ထုတ်ပြန်သည်။ 

စစ်ကောင်စီ၏ ၅၆၄ တပ်ရင်းဌာနချုပ်ကို ယမန်နေ့ ဧပြီလ ၅ ရက်နေ့ နံနက် ၈ နာရီအချိန်တွင် တပ်ရင်းတစ်ခုလုံးကို အပြီးသတ်သိမ်းပိုက်နိုင်ခဲ့သည်ဟု ယနေ့ နံနက် အစောပိုင်းက ရက္ခိုင့်တပ်တော် AA မှ ထုတ်ပြန်ကြေညာထားသည်။ 

ခမရ ၅၆၄ သည် ဘူးသီးတောင်မြို့၏ အရေးပါသော တပ်ရင်းဌာနချုပ်တစ်ခုဖြစ်ပြီး စကခ (၁၅) လက်အောက်ခံဖြစ်သည်။ 

စစ်ကောင်စီသည် ဘူးသီးတောင်မြို့၏ အရေးပါသော ခမရ ၅၆၄ တပ်ရင်းဌာနချုပ်ကို မကျဆုံးစေရေးအတွက် ကြည်း၊ လေတို့ဖြင့် အသည်းအသန် ပူးပေါင်းကာကွယ်ခဲ့သော်လည်း AA က ၅ ရက်အကြာတွင် အပြီးသတ်တိုက်ခိုက်သိမ်းပိုက်ခဲ့ကြောင်း သိရသည်။ 

အဆိုပါ တိုက်ပွဲအတွင်း စစ်ကောင်စီတပ်သား ၈၀ ကျော် သေဆုံးသွားပြီး လက်နက်ခဲယမ်းများ၊ စစ်အသုံးအဆောင်ပစ္စည်း အများအပြားကို သိမ်းဆည်းရမိခဲ့သည်ဟု ရက္ခိုင့်တပ်တော် AA က ဆိုသည်။ 

ရက္ခိုင့်တပ်တော် AA သည် ဘူးသီးတောင်မြို့က စစ်ကောင်စီ၏ အရေးပါသော ခမရ (၅၅၂) တပ်ရင်းနှင့် တောင်ဘဇာစစ်စခန်းကို မတ်လအတွင်းက အပြီးသတ်သိမ်းပိုက်နိုင်ခဲ့ပြီဖြစ်သည်။ 

ဆက်လက်ပြီးလည်း ဘူးသီးတောင်မြို့က စစ်ကောင်စီ၏ တပ်ရင်းတပ်ဖွဲ့များနှင့် စစ်စခန်းများအားလုံးကို အပြီးသတ်သိမ်းပိုက်နိုင်ရေးအတွက် ဆက်လက် ထိုးစစ်ဆင်တိုက်ခိုက်နေကြောင်း AA က ထုတ်ပြန်ပြောသည်။ 

အလားတူ မောင်တောမြို့နယ် ကြိမ်ချောင်းစစ်စခန်းကိုလည်း အပြီးသတ်သိမ်းပိုက်နိုင်ရေးအတွက် ဆက်လက်ထိုးစစ်ဆင်တိုက်ခိုက်နေကြောင်း AA က ဆိုသည်။ 

ရက္ခိုင်ဒေသ၌ အာဏာသိမ်း စစ်ကောင်စီသည် ပြည်သူကိုပစ်မှတ်ထားလျက် စာသင်ကျောင်းများ၊ ဆေးရုံများ၊ ဈေးများ၊ စစ်ဘေးရှောင်နေရာများ၊ ဘာသာရေးအဆောက်အအုံများ၊ မြို့ရွာများရှိ လူနေရပ်ကွက်များကို လေယာဉ်ဖြင့် ဗုံးကြဲခြင်း၊ လက်နက်ကြီးများဖြင့် ပစ်ခတ်ခြင်းတို့ကို နေ့စဉ်ပြုလုပ်ကာ စစ်ရာဇဝတ်မှုများကို ကျူးလွန်လျက်ရှိကြောင်း AA ပြောသည်။

ရခိုင်ပြည်အတွင်း တည်ငြိမ်အေးချမ်းရေးနှင့်ပတ်သက်ပြီး အာဏာသိမ်းစစ်ကောင်စီနှင့် ရက္ခိုင့်တပ်တော် AA တို့ကြား အပြုသဘောဆောင်သောဘက်မှ ကြားဝင်စေ့စပ်ညှိနှိုင်းပေးသွားမည်ဟု တရုတ်နိုင်ငံက ပြောဆိုလိုက်သည်။ 

ယမန်နေ့ ဧပြီလ ၄ ရက်နေ့တွင် ကျင်းပခဲ့သော ကုလသမဂ္ဂလုံခြုံရေးကောင်စီ အစည်းအဝေးတွင် ကုလသမဂ္ဂဆိုင်ရာ တရုတ်နိုင်ငံ၏ အမြဲတမ်းကိုယ်စားလှယ် Geng Shuang က ပြောကြားခဲ့ကြောင်း ဧပြီလ ၅ ရက်တွင် တရုတ်အစိုးရပိုင် CGTN သတင်းက ဖော်ပြသည်။ 

တိုက်ပွဲများ ပြန်လည်ပြင်းထန်စွာဖြစ်ပွားနေသည့် ရခိုင်ဒေသတွင် မြေပြင်အခြေအနေ အမြန်ဆုံးတည်ငြိမ်စေရန်အတွက် တရုတ်နိုင်ငံက အပြုသဘောဆောင်သော အခန်းကဏ္ဍမှ ဆက်လက်ပါဝင်သွားမည်ဟု Geng ကတိပြုခဲ့သည်။

“မြန်မာနိုင်ငံရဲ့ ချစ်ကြည်ရင်းနှီးတဲ့ အိမ်နီးချင်းနိုင်ငံအနေနဲ့ တရုတ်နိုင်ငံဟာ ရခိုင်ပြည်တွင်း ဖြစ်ပေါ်တိုးတက်မှုတွေကို နီးကပ်စွာ လိုက်နာဆောင်ရွက်လျက်ရှိပါတယ်” ဟု Geng ကဆိုသည်။  

တရုတ်ကိုယ်စားလှယ်အဖွဲ့သည် ပြေလည်အောင်ညှိနှိုင်းရန်နှင့် ဆက်သွယ်ရန်အတွက် မြန်မာနိုင်ငံသို့ ရောက်ရှိနေပြီး ပဋိပက္ခဖြေရှင်းရာတွင် တရုတ်နိုင်ငံ၏ တက်ကြွသောချဉ်းကပ်မှုကို ပြသနေကြောင်း သံအမတ်ကြီးက ပြောကြားခဲ့သည်။

Geng က မြန်မာနိုင်ငံနှင့် တရုတ်နိုင်ငံ၏ နက်ရှိုင်းသော ဆက်နွှယ်မှုရှိပြီး မြန်မာ၏ တည်ငြိမ်ရေး၊ ဖွံ့ဖြိုးတိုးတက်ရေးနှင့် သာယာရေးတို့ကို ပံ့ပိုးပေးရန် ၎င်း၏ ကတိကဝတ်များကို ထပ်လောင်းပြောကြားခဲ့သည်။ 

မြန်မာနိုင်ငံနှင့် တရုတ်နိုင်ငံ၏ ချစ်ကြည်ရင်းနှီးမှု မူဝါဒသည် မြန်မာနိုင်ငံရှိ ပြည်သူအားလုံးအတွက် အကျုံးဝင်သည်ဟု ကတိပြုကာ ရခိုင်ပြည်အတွင်း အကျပ်အတည်းကို ငြိမ်းချမ်းစွာဖြေရှင်းရန် အပြုသဘောဆောင်သည့် အခန်းကဏ္ဍတစ်ရပ်ကို ဆက်လက် ပံ့ပိုးကူညီသွားမည်ဟု ၎င်းက အတည်ပြု ပြောကြားခဲ့သည်။

တရုတ်ကိုယ်စားလှယ် Geng Shuang က ရခိုင်ပြည်အရေးကိစ္စကို ဆွေးနွေးခဲ့သလို မြန်မာ့ငြိမ်းချမ်းရေးကိုလည်း ဆွေးနွေးခဲ့ပြီး မြန်မာနိုင်ငံအပေါ် ပိတ်ဆို့အရေးယူနေကြသည့် အဆိုပြုချက်များကိုလည်း ကန့်ကွက်ကြောင်း ထုတ်ဖော်ပြောဆိုခဲ့သည်။